მელოდია - იცით როგორ ჩნდება ცისარტყელა?

წვიმის წვეთებმა მზის სხივები აირეკლა და ერთი ცისარტყელა კი არა, ცაზე სამი ცისარტყელა ერთად დაანახა ლევანს. გაკვირვებული უყურებდა და აკვირდებოდა  ფერებს, რომელთა სიმრავლემაც გააკვირვა. ძალიან მოსწონდა რკალად გაფერადებული ეს რამდენიმე ზეცის და მიწის ბილიკი და მის ყველა დეტალს  იმახსოვრებდა, ფერების თანმიმდევრობას, სიმაღლეს, სიკაშკაშეს. თითოელ ფერს სათითაოდ თვალი რომ გააყოლა, ეგონა, რომ ფერადი ხაზებით დახატულ და  აჟღერებულ მელოდიებს უსმენდა.  საოცარი ჰარმონიაა, როცა უცქერ და გგონია რომ ცას უახლოვდები.

-როგორი ლამაზია არა, იცით როგორ ჩნდება ცისარტყელა? -გვეკითხებოდა მასწავლებელი მერვე კლასში.

-კი. -უპასუხა მოკლედ ერთმა. ჩვენ სრულიად მონუსხულები ვცდილობდით ბუნების ეს სილამაზე აღვექვა ჩვენი გაგებით, ბავშვური აღტაცებით. გვეგონა, რომ საოცრებაში ვიყავით და გვინდოდა სამუდამოდ დაგვხსომებოდა.

-აბა როგორ? -ჩაეძია მასწავლებელი.

- მაგნიტურიმოვლენა. -თქვა იგივე მოსწავლემ.

-მზის შვილები, ცის ბილიკი, ნისლი... -აყვნენ სხვები.

-ბუნების მელოდია. -ჩემს მიერ წაკითხული ცისარტყელაც გავამხილე.

-თქვენ პატარა ფიზიკოსი, ქიმიკოსი, მწერლები და პოეტები ხართ. -გვითხრა მასწავლებელმა და ჩვენც გვიხაროდა. როდესაც მას ვინმე ესაუბრებოდა, სახეზე სულ კეთილგანწყობა აღებეჭდებოდა ხოლმე და თითოელ ჩვენს ვარაუდზეც კეთილი ღიმილი არ ტოვებდა მის სახეს, მაგრამ მაშინ მისი ღიმილი დამცინავი ადამიანის ღიმილად მომეჩვენა. ახლა ვხვდები რომ ის ჩვენში, ჩვენს ვარაუდებში ხედავდა ჩვენს ფიქრს, აზრებს, დამოკიდებულებას, მას შეეძლო ჩვენი ფიქრით ეფიქრა.

-არა, ცისარტყელის წარმოქმნის მიზეზი, წვიმის წვეთებში მზის სხივის გარდატეხა და არეკვლაა.-გვითხრა, თუმცა ვერ მივხვდით.

-იქნებ გვეჩვენება მასწ? -მაგნიტური მოვლენის ვარაუდის ავტორი უკვე მასწავლებლის ვარიანტსაც უარყოფდა.

-ინგლისელ ფილოსოფოსს როჯერ ბეკონს სწორედ ასე მიაჩნდა, რომ ცისარტყელის ფერები თვალის სისველით გამოწვეული სუბიექტური მოვლენაა, მაგრამ ცისარტყელა ჩნდება იმოტომ, რომ სინათლის სხივი გარდატყდება წვიმის ან ნისლის წყლის წვეთებში, რომლებიც ჰაერში ლივლივებენ. ეს წვეთები კი სინათლეს სხვადასხვა ფერად შლის.

- როგორც უკვე ვთქვით - აგრძელებდა მასწავლებელი. -ცისარტყელა მიიღება წვიმის წვეთში სხივის გარდატეხით და არეკვლით.  ჩვეულებრივ, სხივი წვიმის წვეთში ბევრჯერ აირეკლება, რის შედეგადაც იგი ნელ-ნელა კარგავს თავის ენერგიას. სწორედ ამიტომ რაც უფრო ბევრჯერ აირეკლება სხივი წვეთში, მით უფრო სუსტი ცისარტყელა მიიღება.

-ყველაზე კაშკაშამ ერთხელ აირეკლა?

-დიახ. ყოველი წვეთის შიგნით სხივის ორმაგი არეკვლა მეორე ანუ დამატებითი ცისარტყელის წარმოქმნას განაპირობებს, რომელშიც ფერების თანმიმდევრობა შეცვლილია.

ისევ ცისარტყელას ვუყურებდით, მაგრამ ის ნელ-ნელა ქრებოდა. მელოდია ბოლო მონაკვეთში საგრძნობლად დაბლდებოდა და მთავრდებოდა.

-იცით ზღაპარი ცისარტყელაზე?

უარყოფის ნიშნად ყველამ თავი გააქნია.

ზღაპარი ცისარტყელაზე:

...ზარი დაირეკა. მერხებიდან საკონტროლოსრვეულებიავკრიბეთ, მასწავლებელმა მათი სწორადდალაგებაგადაწყვიტა, ცოტართულადმოეჩვენადაპირდაპირჩანთაშიჩაყარა. იმ დღეს საკონტროლო წერა გვქონდა ფიზიკაში, თუმცა ჩვენ ცისარტყელის ქცევას და ფერებს ვაკონტროლებდით, ჩემთვის კი ის მელოდიად ჟღერდა.

წვიმის შემდეგ ქალაქი ჯერ კიდევ გრილი იყო და შესვენებაზე სკოლის ეზოში გავიქეცით.